- BeurlaEnglish
- Simple GaelicSimple Gaelic
- GàidhligGaelic
Latha mòr na h-òige (youth)
Cùm suas leis na naidheachdan as ùra bhon a Mhòd Nàiseanta Rìoghail 2009, bhon Òban! Latha fìor mhath airson na h-òigridh! Faigh barrachd (more) a-mach bho sgrìobhadair ainmeil (accomplished writer) Alasdair Caimbeul....
Bha gu leòr a’ dol air Diardaoin a’ Mhòid, latha mòr nam bonn òr (gold medals): Bonn Òr a’ Chomuinn Ghàidhealaich agus Bonn Òr mar chuimhneachan air (in memorial of) Màiri NicLaomainn (farpais an t-seann nòs (traditional style)). Bha na tallachan (halls) gu math trang agus bha a h-uile duine a fhuair na prìomh dhuaisean (prizes) sna ficheadan (twenties).
Bhuannaich Sìneag Nic an t-Saoir, 23, à Cille Pheadair ann an Uibhist a Deas am bonn òr airson na mnathan (ladies). Bhuannaich i farpais an t-seann nòs mu thràth ann an 2006, agus mar sin tha i a-nis air an dà phrìomh dhuais airson seinn aig a’ Mhòd a bhuannachadh. Thuirt Sìneag: “Bha mi a’ faireachdainn gu math nearbhach (nervous), agus bha an fharpais gu math faisg, ach tha mi dìreach toilichte gun do rinn mi an gnothaich.”
Tha Sìneag ag obair aig a’ chompanaidh telebhisean Ghàidhlig Bees Nees ann an Glaschu agus bha i na h-oileanach aig an RSAMD far an d’fhuair i comhairle agus teagasg bho Cheanna Chaimbeul, agus bha Ceanna fhèin air an àrd-ùrlar (stage) Diardaoin oir bha an Comunn a’ cuimhneachadh gur e 50 bliadhna bhon a bhuannaich Ceanna agus Alasdair Grannd am bonn òr iad fhèin.
Bhuannaich Stephen MacÌomhair à Naast faisg air Poll Iubh bonn òr nam fear. Tha Stephen fhèin 23 agus tha e ag obair sna meadhanan (media), mar Co-òrdanaiche Riochdachaidh (Production Co-ordinator) Gàidhlig aig STV. Thuirt Stephen: “Tha mi gu math toilichte gun do bhuannaich mi, agus rinn mi cadal math a-raoir ged a bha mi beagan iomagaineach. ’S e seo an còigeamh turas (fifth time) a bha mi a-staigh airson am bonn òr, agus tha air mo dhòigh leis mar a chaidh dhomh am-bliadhna.”
Ann am farpais an t-seann nòs bhuannaich tè òg eile a’ phrìomh dhuais airson na mnathan, Liondsaidh Mitchell à Breascleit ann an Leòdhas, a tha na h-oileanach aig Sabhal Mòr Ostaig an-dràsta. Rinn Liondsaidh, 25, ionnsachadh air a’ Ghàidhlig aig a’ cholaiste san Eilean Sgitheanach, agus tha i an dùil, às dèidh ceumnachadh (graduating), for-cheum (postgraduate degree) a dhèanamh ann an Ceòl sa Choimhearsnachd a bhios a’ cuideachadh daoine tighinn air adhart gu pearsanta.
Thuirt i: “Bha mi uabhasach toilichte gun d’fhuair mi chun a’ chuairt dheireannaich (the final), agus cha robh dad a dhùil agam gu robh mi a’ dol a bhuannachadh. Tha e fìor mhath agus chuidich Christine Primrose mi gu mòr.”
Agus b’ e fear às Dùn Bheagan anns an Eilean Sgitheanach, Darren MacIllEathain, 26, a bhuannaich farpais seann nòs nam fear. Thuirt e: “Bha farpais mhath ann. Ach bha a h-uile duine cuideachd gu math càirdeil. Cha robh dùil agam gum buannaichinn an fharpais, ach tha mi air mo dhòigh. Agus bha e math gur e òran òil (drinking song) bhon Eilean Sgitheanach aon de na h-òrain a bh’ agam, ghabh mi òran Sgitheanach nuair a bhuannaich mi am bonn òr san Òban o chionn 6 bliadhna.”
Agus sin e, cearthar feadhainn òga uile a-nis a measg ghaisgich (heroes) a’ Mhòid. Chòrd na farpaisean fìor mhath ris an luchd-èisteachd agus ris na britheamhan (judges), agus tha a h-uile duine a-nis a’ coimhead air adhart ri farpais nan còisirean (choirs) mòra feasgair Dihaoine.
Le Alasdair H Caimbeul
Chan eil gin a bheachdan mun rud seo.