Fiosrachadh do Luchd-turais

’S e gnìomhachas uabhasach cudromach a th’ ann an turasachd do dh’Alba, agus e a’ cur £4 billean ri eaconamaidh na dùthcha gach bliadhna agus a’ cruthachadh 200,000 obair – agus tha e nas cudromaiche buileach do sgìrean Gàidhealach. Ann an dòigh dh’fhaodadh tu a ràdh gu bheil àiteachan mar a’ Ghàidhealtachd a’ dèanamh sanasachd orra fhèin, ri linn ’s cho bòidheach sa tha iad agus cho beartach agus brìoghmhor sa tha an cuid dualchais, agus chan fheumar an reic. Cò tha a’ dol a dhìochuimhneachadh a’ chiad turas a chì iad mòrachd a’ Chuilthinn san Eilean Sgitheanach, no cò troimhe nach deidheadh gairiseachadh nan seasadh iad air Druim Athasaidh air latha fuar, earraich coltach ri latha Chùil Lodair fhèin? Ach às aonais fiosrachaidh, cha bhi fhios aig daoine air an iomadh sealladh brèagha, no thèid iad seachad air na làraich eachdraidheil gun fhiosta.