Seallaidhean

Tha dealbh againn uile nar n-inntinn den Ghàidhealtachd, no de na h-eileanan, no de Ghàidheal. Agus tha a’ mhòr-chuid againn air dealbh-camara no dhà a thogail fhad ’s a bha sinn air ar saor-làithean no air turas don Ghàidhealtachd is na h-Eileanan. Ach às bith cia mheud dealbh a thog thu no cia mheud sealladh a chì thu, tha an còmhnaidh ìomhaigh ùr a’ feitheamh riut nuair a thadhlas tu air a’ Ghàidhealtachd no nuair a thèid thu gu ceàrnaidh sam bith de dh’Alba. Le sìde agus solas a tha a’ sìor atharrachadh, tha seallaidhean na Gàidhealtachd agus na h-Alba a’ mùthadh agus a’ nochdadh ann an cruthan eadar-dhealaichte fad an t-siubhail. Air a’ mhonadh no sa bhaile, tha cuimhneachan agus ìomhaighean ùra rin togail. Carson nach toir thu dhuinn do shealladh air a’ Ghàidhealtachd agus na Gàidheil?