4 rionnagan

‘S e clàr ùr a th’ ann an Òran ùr do Mhuile le measgachadh breàgha de dh’òrain ùra a chaidh a sgrìobhadh le iomadh sgrìobhadair agus neach-ciuil mar phàirt de cho-fharpais ùr gus Mòd Ionadach na Dreòlluinn a chomharrachdh a tha a-nise 70 bliadhna dh’ aois.

‘S e òrain inntinneach a th’ annta a tha a’ coimhead air diofar chuspairean mar an t-Eilean fhèin, a eachdraidh, a chànan, a chuid sgeulachdan gaoil agus fiu ’s òran bho Bhana-Mhuileach gu math òg, Shannon NicIlleathain, ann agus chan ann mu dheidhinn Muile idir a sgrìobh i ach mu a brathair, Sean!

’S iad na seinneadairean ionadail Kirsty NicFhionghain agus Alasdair MacIlleBhàin a tha seinn nan òran air a’ chlàr, ach an t-òran aig Shannon, agus nach iad a tha dèiligeadh glè mhath ris na diofar stoidhlichean ciùil! Dhuinne, ’s iad na h-òrain ‘A Mhuile Nam Beann’ agus ‘Gheibhinn Cadal Math’ (trac 1) a bha sònraichte math.

Sheinn Kirsty, ‘A Mhuile nam Beann,’ a sgrìobh Ailean MacDhòmnhaill, le misneachd agus faireachadh agus ’s e sin gu dearbh a bha dhìth air na faclan a tha bruidhinn air mar a tha Gàidhlig an Eilein a’ sìoladh às.

Tha dà dhreachd den òran ‘Gheibhinn Cadal Math’ air a’ chlàr seo agus sheinn Alasdair a’ chiad dreachd le co-fhaireachadh agus bha e follaiseach gu robh na faclan cumhachdach san òran gaoil seo air drùdhadh air agus bheir iad buaidh air duine sam bith a dh’èisteas ri Alasdair gan seinn.

’S e cruinneachadh mìorbhaileach de dh’òrain inntinneach a tha seo a tha dearbhadh dhuinn na tàlantan sònraichte a th’ aig sgrìobhadairean agus luchd-ciuil an-diugh, agus mar a tha iad comasach cur ris a’ chultar bheairteach a th’ againn mar thà, ann an òrain Ghàidhlig.

Tha luchd-ciuil tàlantach is eòlach a’ cluich còmhla ris na seinneadarain air a’ chlàr agus iad nan còmhlan-taighe. Anns a’ chòmhlan-taighe seo, bha buill bho na còmhlain Findlay Napier agus na Bar Room Mountaineers, Dàibhidh Cattanach agus Màiri Anna NicUalraig, ’s i a riochdaich an clàr còmhla ri Nick Turner

Ged a tha iad air seinneadairean gu math comasach a chleachdadh airson a’ phroiseict seo, ’s dòcha gu bheil cunnart ann nach eil na h-òrain uile air an cur an cèill san dòigh as fheàrr as urrainnear, seach nach bi a h-uile òran ’s dòcha freagarrach do ghuthan nan seinneadair. ’S math dh’fhaodte gur e puing a tha seo air am bu chòir smaoineachadh, ma thèid a’ cho-fharpais seo a chumail a-rithist, agus tha sinne an dòchas gun tèid! ’S e cothrom air leth a tha seo gus cur ris a’ chultar bheairteach a th’ againn agus gus na h-àiteachain breàgha san dùthaich seo, a mholadh.

Faodidh sibh lethbhreacan den chlàr a cheannach an seo agus cuideachd facail nan òran a leughadh, a bharrachd air eachdraidh-beatha an luchd-ciuil.